Ano tawagan dun sa pag gustong patayin ng nanay yung bagong panganak niyang baby? Wala lang, gusto ko lang tanungin. Pero kung ikaw kaya, nagluwa ng tao mula sa ari mo, may karapatan ka naman sigurong mabaliw kahit saglit lang. Ngayon na nasa subject narin nun, oo, aaminin ko na, buntis ako. Pitong taon na kong may kargang bata. At ayaw niyang lumabas kasi napaka sakim at makasarili raw ng mga tao dito. Di ko alam kung saan niya napulot yon pero yun ang paulit ulit niyang sinasabi. Sinubukan ko ngang ipaliwanag na hindi na si GMA ang presidente pero wala naman daw talagang pinagkaiba yun. Sabi niya sakin maghintay lang ako, pero wala siyang binanggit kung gaano katagal. Malalaman ko nalang daw kung panahon na. At kung hinayaan kong lumipas ang pagkakataong yon, hindi na raw siya maaaring lumabas. Kaya lagi akong tahimik na nakaupo at hintay lang nang hintay. Sayang naman kung hindi niya makita ang mga kagandahang nakikita ko, at habambuhay nalang na nasa dilim.
No comments:
Post a Comment